Papaano na?

‘Di ka na marunong magtagalog?

Inirapan mo ‘ yong ninuno

Itinakwil ang magulang na yumao

Sinabing walang pakialam ‘di umano.

Salat na ilong

Dilat na mata

Maiitim na singit

Pinaputing maskara

Parang pulbura

Pinabangong suka

Ang iyong pawis…

Papaano na?

‘Di mo na naalala

Iyong sariling lahi

Pati yong kinagisnang budhi.

Kinawayan nang kaibigan

Nakipagbeso-beso

Sinabing ikaw ay Amerikano

Ingles mo’y may buntot

Parang kabayong bansot.

Namasyal sa bayan

Mapanghi daw ang kalsada

Nagmumura’t pulos patutsada

Ayaw nang makipagkilala.

Kara-karakang tumakbo

Parang napasong ipo

Ipinikit ang mata

Tinakban ang tenga.

Nagmamadaling lumayo

Humihingal Humahangos

Sinaway ang manlilimos.

Ikaw ba ay ganap na kano na?

Makipagbayanihan, nilimot na?

Namilipit sa hiya

Matapobreng banyaga

Papaano na?

Kapatid kong balikbayan

‘Di mo na kilala

Ang sariling wika.

Pinagtawanan si Rizal

Sinabing siya ay hangal

Dinuro si Bonifacio

Sinabing siya ay bobo

Inirapan si Aguinaldo

Sinabing siya ay tarantado

Tinuligsa si Aquino

Sinabing siya ay martir at sira ulo

Papaano na?

Kapatid kong Kano?

Maasim ang mukha

Kapag kumain nang balot

‘Di na marunong magluto nang kare kare

O magisa nang bagoong alamang, pare

Papaano na?

Puro MACdo ka na lang ba?