Cellphone

Kumikinang ang buwan

Nakangisi ang mga tala

May tumatagay sa kanto

Pero wala silang sinasanto.

Dumaan ako sa gilid

Sa ilalim nang estero

Nakita ang isang dilag na nagmamadali

Tumawag sa cellphone

Walang sumagot

Hinatak nang lasing

Hinalikan Hinaplos

Tumabi ako sa dingding

‘Di ako makakilos

Baka mamataan

May patalim sa iyong tadyang

Sumigaw kang “Saklolo, tulungan ninyo ako!”

Binirahan, inihian at hinubaran

Sumugod ako

Sabay ang takbo

Sinabi mong, “Salamat manong, ‘di ako naligpit!”

Humagolgol. Humiyaw

Nawala kamo’ng cellphone na isang taong ibinuno

Parang asong nawalan nang buntot

Sinamahan ka sa precinto nang parak

Iyong kaso ay pangkaraniwan

Sinabing magpasalamat ka

‘Di ka na tamaan.

Ilang araw ang lumipas

Kinamusta kung nabawi ang cellphone

Sabi mo, “Walang kuwenta,

‘di bale na lang”

Inabot ko sa iyo

Bente mil, sabi mo

“Salamat nang lubos”

Dali-daling nagpaalam

Pinagmasdan ang Langit

Nagtago ang buwan

Umiiyak ang mga tala

Umihip ang amihan

Ala Ondoy o Pepeng parating

Santo santisima

Diyos ko, patawad!